भूगोलपार्कमा मूर्ति प्रतिस्थापन गर्ने निर्णय यथास्थितिमा राख्न अन्तरिम आदेश जारी

0
48

काठमाडौँ– सर्वोच्च अदालतले काठमाडौँको भूगोलपार्कमा नेपालमा रातो मत्स्येन्द्रनाथ ल्याउने राजा नरेन्द्रदेव, तान्त्रिक बन्धुदत्त आचार्य र ललित ज्यापूको मूर्ति प्रतिस्थापन गर्ने निर्णय यथास्थितिमा राख्न अल्पकालीन अन्तरिम आदेश जारी गरेको छ।

न्यायाधीश टंकबहादुर मोक्तानको एकल इजलासले शुक्रबार उक्त स्थानमा मूर्ति निर्माणका लागि शिलान्यास गर्ने कार्य यही पुस २९ गतेसम्मका लागि रोक्न अल्पकालीन अन्तरिम आदेश जारी गरेको हो। अदालतले यही पुस २९ गते दुवै पक्षलाई छलफलका लागि बोलाएको छ।

संस्कृति, पर्यटन तथा नागरिक उड्डयन मन्त्रालय, पुरातत्व विभाग, कामपा वडा नं २२ को वडा कार्यालय र भूगोलपार्क सुधार समितिलाई विपक्षी बनाइ अधिवक्ता पदमबहादुर श्रेष्ठले भूगोलपार्कमा मूर्ति प्रतिस्थापन गर्दा पाटन तःबहालकै अनुसार बनाउन आदेशको माग गर्दै रिट निवेदन दायर गरेका थिए।

भूगोलपार्कमा २०७५ साल माघ १२ गतेको निर्णयअनुसार नेपालमा रातो मत्स्येन्द्रनाथ ल्याउने राजा नरेन्द्रदेव, तान्त्रिक बन्धुदत्त आचार्य र रथचक्र ललितज्यापूको मूर्ति स्थापना गर्न लागिएको तर पाटन तःबहालमा स्थापना भएको मूर्तिको ठीक विपरीत मूर्ति बनाउन लागिएको रिट निवेदनमा उल्लेख थियो।

रिट निवेदनमा मूर्ति पाटन तःबहालस्थित रातो मत्स्येन्द्रनाथको मन्दिर परिसरमा रहेको सर्वमान्य मूर्तिको स्वरूपमा नै निर्माण गरी भूगोलपार्कमा स्थापना गर्न परमादेशको आदेश माग गरिएको छ।

LEAVE A REPLY

Please enter your comment!
Please enter your name here