तिहार र छठपछि कडा खालको निषेधाज्ञा जारी गर्न काठमाडौं उपत्यकाका मेयरहरुको सुझाव

काठमाडौं । आउनै लागेका तिहार र छठपछि कडा खालको निषेधाज्ञा जारी गर्न कोभिड—१९ संकट व्यवस्थापन केन्द्र (सीसीएमसी) काठमाडौं उपत्यकाका मेयरहरुको फोरमले सुझाव पेश गरेको छ । सीसीएमसीका पदाधिकारीहरुसँग आज मेयर फोरमका पदाधिकारीहरुले बैठक गरेका थिए ।

सो बैठकमा यस्तो आग्रह गरेका हुन् । उक्त फोरमले पछिल्ला हप्ताहरुमा काठमाडौं उपत्यकामा कोभिडको संक्रमण दर निकै बढेको भन्दै यसलाई नियन्त्रणका लागि कडा निषेधाज्ञाको आवश्यकता रहेको बताएको हो । उपत्यकाको मेयर फोरमका सचिव मदनसुन्दर श्रेष्ठले भने, हामीले सरकारलाई कडा खालको निषेधाज्ञा गर्न भनेका छौँ, पछिल्लो समय बढ्दै गएको संक्रमण रोक्ने अरु उपाय हामीसँग छैनन् । 

उपत्यकामा बढिरहेको संक्रमण दर नियन्त्रणका लागि तिहार छठलगत्तै निषेधाज्ञा जारी गर्ने भन्ने विषयमा गम्भिर छलफल भएको उनले बताए । उपत्यकामा बढिरहेको संक्रमणलाई नियन्त्रण गर्न कडा निषेधाज्ञा आवश्यकता भएको उल्लेख गर्दै उनले सीसीएमसीका पदाधिकारीले अर्को बैठकमा कस्तो मोडालिटीमा जाने भन्ने छलफल गरी प्रस्ताव गर्ने बताए ।

उनका अनुसार सीसीएमसीका पदाधिकारीहरुसँगको छलफलमा कोभिडबाट उत्पन्न समस्या समाधानका विषयमा पनि छलफल भएको थियो । महामारी नियन्त्रणका लागि स्थानीय तह र संघीय सरकारबीच समन्वन हुन नसक्दा समस्या झन बल्झिएको भन्दै यो महामारी नियन्त्रणका लागि एकीकृत रुपमा सहकार्य गर्नुपर्नेमा आफूहरुले जोड दिएको पनि उनले बताए ।

Leave a Reply

Your email address will not be published. Required fields are marked *